انسحاب

 حبل افكارى ياجماعه غير اى حبل اة والله الحبل طويل اوى وعشان كدة متلعبق اوى .

لخبطه مافيش نظام .

الافكار ملخبطه تخيلو معيا مثلا ان الافكار ديه كأنها اشخاص وكل شخص بيعبر عن فكرته مثلا .

يجى شخص من اشخاص افكارى مهم ونكدى ودة بيكون اكبرهم فى القوة والشخصيه  يعبر عن شخصيته ويبتدى يرصد فى الافكار

 وتبتدى تتفاعل مع الشخص النكدى دة بعض اعضاء جسمك زى الدموع والصداع وهتبتدى فى التفاعل .

 فجاءة بدون سابق انذار يقوم شخص تانى من حبل افكارى ونتخيله مثلا شخص مزعج  وظيفته التشتيت يقوم يكعبل الشخص النكدى او الفكرة ويجى باغنيه مثلا او فكرة غبيه بعيدة كل البعد عن فكرة النكد .

ييطلعك او يدخلك اكتر فى مود النكد وبرضه تقوم الفكرة التالته تعبر عن رائها من غير استئذان تفكرك بحاجه ناسيها المقصود انها تلخبط الفكرتين اللى قبل كدة وتبتدى معاك حفله الافكار فى تسابق مين اللى يهدى ومين يشعلل ومين يتريق ويهزر ومش وقته .

الحرب ابتدت .

 المهم الفكرة اللى هتبقى واضحه فى وسط الافكار وتحصل خناقه بنهم والحبل يتلخبط ويتلعبق اكتر واكتر وانت كشخص تتعب وتقول مش عارف اركز وتتخنق ونفسك تهرب من دماغك بس هتهرب ازى ماهى ركبه فوق جسمك ماااافيش مفر .

اختار الحل اللى يناسبك .

1 ) هتاخد قرار صح انك تهدى وترتب حبل افكارك هتكتشف ان الحبل بقى شبهه حبل سبت البلكونه متلعبق ومعقد پس لازم تفكه بدل ماتنزله ويشبط فى البلكونه اللى تحتك ومتعرفش ولاطلعه ولاتنزله وتعمل مشكله مكانتش على البال ولا الخاطر  .

بالظبط زى الافكار لازم ترتب افكارك فكرة فكرة عشان تزبط وتترتب علشان تعرف تكلم وتعبر بسهوله ومتدخلش فى مشاكل جانبيه بالظبط زى حبل السبت تقدر تنزله بسهوله من البلكونه .

وهنا هتبقى شخصيتك قويه ومنظمه وعندك مقدرة لوصل الهدف اى ان كان .

 2 ) ياتسيب نفسك تمشيك دماغك وافكارك زى ماهى عايزة وتستسلم .

كدة تبقى انتى شخصيه مستسلمه وتشبيهى لحضرتك انك زى السفنجه تمتص بس .

فى الحاله ديه من حقك انك تقول خايف من دماغى .